مرات الواحد يطلع بأستنتاجات عجيبة
لما يفكر فترة طويلة وممكن يوصل لدرجة يشوف نفسه مثل المخبّل
خصوصا" أذا الحسبة عويصة و ماكو لاعارفه ولافريضه ولا حكم دولي
البارحه بالحي الصناعي سوّيت صيانه دورية (صدر بلكات دسكات فلاتر دهن بخاخات ) أستغليت الوقت لأن كانت الدنيا تمطر مطر هاديء مستمر و رجّال اللي يعبّي بالسكلّة ركَي و يخلص شغلاته اللازمه سره خصوصا" بهذا الوكت
مشيت على نظريتي (الوقت كالشرطي أذا صفنت بوجهه ... حبسك )
وبعد ماخلصت من السلام والأحضان و السوالف مع الأسطوات فارس و أحمد و سيد أيوب قفلت الجام و كعدت وهمة وصنّاعهم يشتغلون لوحدهم , يعرفون منين يبدون و وين ينتهون , الحاجة التالفه يقلعوها و الزينة يصلحوها بين تنظيف و تصليح وتبديل ودعفسات وكل خمس دقايق يجيني واحد يسألني :
أبو علي تريد أنحط أصلي لو عادي , ومن يسألوني رأسا" أفتهم الفلم
ومعناها بلغة الحي الصناعي : حضّر نفسك لسعر جديد فوك السوك وشوف شغلك بالتوريق أبو علاوي الورد
عيوني خلّو الأصلي لأن مالي خلك عطلات يومية هو آني دربي مشايفه وقابل باقيه عليكم أشو واحدنا صاير بكَال مفرهد و البوكَ صار عدنا دراسة وتعليم نشوفه يوميه بالتلفزيون
كانت فرصة للتأمل وأشتغلت الحسبات مثل شريط السينما ذكرتني بأيام الثمانينات
لما كنا نكَعد على كورنيش الأعظمية ماعدن لا ماما ولا دادا آني ومحمود وعماد وغانم و مهند و نكَوم نتخيل ونتفلسف و نخترع
حتى مرّة كعدنا بالسعدون و شطح خيال مهند و صاح : أريد أصير رئيس جمهورية , قابل الرئيس أحسن منّي طفرنا بوكتها حتى هيثم نسى حذائه ورجع حافي لأهله
وراها حلفنا ميت يمين بعد ما نمشي وياه لو تنقلب السماء على الأرض .. لأن أكيد تخبل
خلّي أرجع لسالفتنا عن الأصلي و أتفلسف شويّة قابل باقيه عليّه :
أكَول ليش مانستعمل الأصلي بشغلاتنا الما ألها حل ... شغلاتنا نفسها اللي تعرفوها
ذيچ السنة بريطانيا كثرت طلايبها وصارت مشاكلها متعودة وعادية ودايما" راحت جابت واحد ( أصلي ) من ألمانيا و نصّبته على نفسها ملك , أي وروح الأعزاز (حتى أقروا كتب التاريخ والشغله دستوريّة وأكو بيها سابقة تاريخية) جابوه من ألمانيا و صار على بريطانيا العظمى اللي متغيب الشمس عن طوايفها و سلفها .. أنريد نجيب فد ياباني أصلي يصير علينا ملك أو حتى رئيس مراح تفرق المهم تصير بيده الصايه والصرمايه و يشتغل عدل وروح أبوكم راح أمورنا تستعدل ونطلع من عنق الزجاجة على كولت مطرب المرحلة محمد السالم بأغنيته :
بله بله بله بله .. أحسن حل للمشكله ..اللي مايحن عليّه آني خوب أروح أله
أولا" : نخلص من الطائفية وسوالف التاريخ والجغرافية وكل بلاوي المحاصصة والطراكَيع المرتبطة بها ونهتم برواحنا و نعوف الشغلات المتوكل خبز
ثانيا" : راح نستعمل ثلث الميزانية التريليونية ونصيرمثل اليابان ويجوز أكثرأما الثلثين الباقية فنستثمرها و نسوّيها مشاريع عالمية تشتغل و صدكَوني خلال شهر أو شهرين يصيرالدينارالعراقي العملة الأصعب بالعالم قبل الدولارواليورو والأسترليني وحتى الين الياباني يطوّف لأن عدنا فوك الأحتياطي السائل ثلث أحتياطي العالم من النفط و يكون ضمان لكل مستثمر , وبهاي الطريقة نصير أقوى أقتصاد محد يقارش ويّانا والدول كُلها تكَوم تريد خاطرنا , وننسى المؤامرات الأقليمية من الخارج أما من الداخل فراح تنتهي كل المشيجيخات اليومية اللي نشوفها قبل الأكل وبعد الأكل لأن الوادم راح تشبع فلوس و تكَوم تفكر تسافر و تتونس و تتنوعم وتفوخ وتحجي باليعني و بالنسبه للشسمه و تصير عدها عوائل وأملاك تخاف عليها من نسمة الهوى
ثالثا" : تصير اللغه اليابانية هي اللغة الرسمية وكلها تكَوم تحچي بلهجة وحده :
چا چي آچل يولّي لا آد كاكا كولكم يسير هباب ويجر آدل
و نخلص من سالفة الشروكَي والغرباوي والكردي أما المسيحي و المندائي و الأيزيدي أحلفلكم ليكَدام راح يطكَون أصبعتين و يحتفلون ثلثمية وخمسة وستين ألف مرّة بالسنة
مشكلة وحده راح تواجهنا ويّة رئيسنا الياباني :
لأن متعوّد يشرب عركَ وياكُل لحم چلب وسمچ ني يسموه سوشي و حتى عكَارب و عكَاريكَ و حيايه مرقطه ...محلولة وداعتكم .. ندزله (جماعة ربعنا) وياهم (ربع جماعتنا) وأكيد راح يقنعوه ويصير متديّن ... بس خايف من شغلة وحده , أخاف الجماعة يتعاركون كَدامه ونتفشّل
... أكيد يتعاركون لأن الكُترين يكَول آني حزب الله المختار و محد غيري باللعب , هم مو مشكله خلي يبقى كافر أحسن لأن محد راح يفك حلكَه ويكفّر أي عبد مسلم لأن الكافر الأصلي هو الملك
عوفونا لخاطر الله وخل نسمع حسين نعمة كَاعد يغرّد و يكَول :
حتى المطر يمحي الأثر لا سچة ظلّت لادرب .. وك يا كَلب
شيصير لو تطلع شمس فرحه وعرس
رديت وك رديت لاموعد ولا چلمة نعم
أويلي شكد مشتاق لفد واحد مع الأسف الطريق أنقطع بس تبقون بنص القلب أصدقائي فبكم تزدان الحياة و تكون ألها نكهة وطعم وليلتكم فرح حبايبي
ليست هناك تعليقات:
إرسال تعليق