المسحراتية الحبابين من خريجي أبو غريب

أبو الدمام حيل متعاطف وياه
الوادم تطفح أكل وهو يفتر بالمنطقة
اليوم وصّيت الولد لما يمر يحضروله صينية سحور
شوية صمّون حار مسوييه بالبيت و قيمر عرب و بيض سلق وطق
و مربى مشمش ونمنمات خفيفه من هاذي التعجبكم
ردت ألقي نظرة عليهم وأشكرهم على سهرهم في تكَعيد الصائمين
خصوصا" اليوم لأن قبل شويّة أجت الكهرباء الوطنية والوادم ركضت تنام وما مصدكَه
طبعا" تفاجئت و أستغربت , خطية طلعوا أثنين مو واحد
الأول حمودي أبن الحجية أم مهدي , ذاك اليوم طلع من السجن
بقضية (أستخفر الله ) يكَولون يبيع حبوب , والثاني سعّودي أبن الضابط أبو مثنى
هم كان مسجون (أستخفر الله ) على قضية يكَولون كان عضو بعصابة مدري شنو و حلفوا أهله يكَولون أرتكبوا عليه و أكلها مدبّسة
حقيقة آني حيل أتشكرت منهم و شجعتهم و ياريت الواحد يلاكَي طريقة يكفّر بيها عن ذنوبه وماكو واحد ماعنده فد خمستالاف ذنب .. صحيح همه ماعدهم دين وماعدهم ويّه الصيام كجه ومرحبه , بس حبابين يحسون بتقصير يردون يعوضوه بالمشاركة

الزبده أنو المشاركة هي ما نحتاجه لكي نشعر بأنسانيتنا
خوش مشاركة بس كون الله يستر و لايطلعون ناصبين على بيت يريد يبوكَوه بالمنطقه .. أمساك سعيد حبايبي الأمامير مع رمضان شهر الخير والغزوات

 

محسن لفته الجنابي