التعجيزيات البغدادية و الفهلوه العراقية

التعجيزيات نوع من الحزّورات تكون على شكل عبارات صعبة وملتوية من المستحيل أن يرددها الشخص حين تطرح عليه دون أن يخطيء تستخدم في مجالس السمر والتسلية و الغاية منها قضاء الوقت في زمن لم تخترع فيه بعد وسائل أحراق الوقت من تلفاز وكمبيوتر و غيرها يطرحها الابناء المحلة بسرعة لاختبار بعضهم بعضا في سرعة النطق وصحة الاداء ولاريب ان العجلة في الاداء تؤدي الى التورط في الخطأ وعندئذ يصبح المتورط اضحكوة اقرانه ومثار سخريتهم وغالباً مايكن المؤلف مجهول لكنه  يبرع في حشد الالفاظ المتجانسة التي تلزم المتبارين بنطق كلمات معينة مضحكة بسرعة ثلاث مرات او اكثر .ولابد في هذه الحالة ان يتورط الناطق بلفظة خاطئة تجلب الضحك وتبعث المرح.

وفيما يلي مجموعة مما استطعت جمعه في هذا الباب:

*خالي خضيّر خش للخضرة حاشلنا خوش راس خس
*جيس طرشي ودجاج مشوي 

* هالطماطايه طماطاية من؟
* سدينه شط السيد والسيد ما سد شطنه
* نبگ نبگتنه احسن لو نبگ نبگتكم ..ضوگونه من نبگ نبگتكم وانضوگم من نبگ نبگتنه
* سبع بيضات من بيضات الشظاشظ .طبخناهن وحمسناهن وگلنه شظن ياشظاشظ

* شص ابطن شص

* شمس الشته خوش شمس

* لوري وره لوري

*كمشت خشمي خمس كمشات
* خميس خمش خشم حبش وحبش خمش خشم خميس
* حسين حش هزة حشيش

* ابعانه تتن دچ الجيس دچ

* اتلث اگـنيرات بالخله وحده دبس وحده دهن وحده خله اطفر دهن والطع دبس واطلع خله
* جمل ماشي على ماشي جيت اضمه خطف شاسي

* سبع سعفات اتدك السكف سعفن سكفنه

* ليگـت الدب ايكسر لب كتلت الدب واكلت اللب

* عشر طشوت ,تسع طشوت ,ثمن طشوت ,سبع طشوت

* بنا بنى ببابنا بناتنا تناوله الحجارة

*عند المعيدي زبد وعند امي جسب (تمر زهدي) يمه شيلي چسبچ عن زبد المعيدي ,او يامعيدي شيل زبدك عن جسب امي

* فستبش بنشت بنت بنيبش نبشت بشعرها الطولاني

* ناگـه الخگـعه وفرخ الخعفكَ

* حوش خجه خوش حوش

* خيط حرير فوكَ حيط خليل

* شمس صيف وشمس شته

* لوري نوري وره لوري رشيد

* ياشمسه شسم شمسه؟

* كعب العگـبنگـب بيض الحدرنج

* هاي الجمجه جمجة من؟

* بيدي سمچـتين وفوگـايه سگـف اضرب السمچـه بالسگـف واضرب السگـف بالسمچـه.

 

 

تراث عراقي قديم - مناظرة بين القهوة والشاي للشيخ حمود أبو خزينه السوداني

تراث عراقي عتيق أهديه الى المدمنين :
مناظرة بين القهوة والشاي بعد دخول الأخير الى العراق بصورة قصيدة شعبية للشيخ حمود أبو خزينه السوداني المتوفى في العام 1920 .................................................................
القهوة تخاطب الشاي :
ياعطّار گـلي أشجايبك ليّه ... أنت من العجم وآني يمانيه
الشاي :
آنه الچـاي الحلو تزهي مواعيني ... بللور وبرنج أو معدن وصيني
أنا شاه العجم وأملوك تجنيني ... وگودي من الفحم دخّان مابيّه
القهوة :
أنه بنت اليمن و ربات حاتم طي ... من بيت الكرم و الجود وأهل الزي
أنه جودي چـلت وأنته أشوي شوي ... أصلي من العرب ما نيش عجميه
الشاي :
ديوانچ وحش من كثرة الدخان ... دلّه مصخمه وملطخ الفنجان
خدامچ عبد لو تايه العربان ... محّد فرك وجهه من مزاويّه
القهوة :
أنا شمايكثر الديوان أضرب كيف ... أمرحب باليجي وأفرح بكل ضيف
يظل محزون وجهك مايگـصّه السيف ... زلمه أعلى الثلاثه يصيرلك ديّه
الشاي :
أيامچ مضن واليوم أيّامي ... أنا ليرة ذهب وأنت طرز شامي
آنّه أموّنس الملوك بحسن هندامي ... وأنت مصخمه بدخان مطليّه
القهوة :
أنا بنت العرب وشيوخ تجنيني ... ومن طرت الفجر دگـن هواويني
دلالي أمسكره و صيني فناجيني ... و أومي بالردن عطشان مر بيّه
الشاي:
سماور من شبه ومخدّر القوري ... أبياله مطرزه والصحن فرفوري
أچلي من القند لو شكر بللوري ... وشرابي ملك جاعد أبارسيّه
القهوة :
الأراسي أتأچدت موش لجنابك بس ... دوم الدوم نلعب بيهن محيبس
أنا أمن أحچي أوياك الحلكَ يتنجّس ... شي شفتوا البغل لازر الورديه؟
الشاي :
مامن بعد گـهوه اليوم بس الچاي ... عند أهل المدن والعرب مثل الماي
أمشي للعجم وأتزامطي وياي ... ماترضين بيهم للخباريه
القهوة :
ما عرف الرطين وما أعرف عجمان ... أصلي من العرب ماني أمن أهل طهران
آنه وياك الطلابه نمشي لـ(سلمان) ... يفرض بالنزاهه والعزوبيه
العارفه سلمان الغيلان :
نحچي بالفرس والفرس مذمومين ... العرب منهم تسمى طه أو ياسين
فركَ بين الأجلّه ولبدة النذلين ... أهل گـهوه وكرم وهل المعرفيّه
الشاي :
يرضى بالفراضه مشتبه سلمان ... أيعيب أعلى الفرس منهم أبن شروان
بيمن نزلت الآيه ونصّت القرآن؟ ... نزلت بالعجم يو باليعربيّه؟
القهوه :
مانحچي أبفرع ويّاك وديانه ... نحچي بالچريم و بشر بلسانه
ياهو المنتصب للظهر ديوانه ... أو ياهو الساد بابه وحاطله أربيّه ؟
.............................................................................
كل الشكر والتقدير الى الأستاذ / عبد الحميد كنين الذي حصل على القصيدة

صورة من أحد أسواق العراق في القرن التاسع عشر

سوالف ربعنا .. حكايات من عمق المجتمع

طالب كان نايب ضابط بالجيش ومدّمر الجنود , ريّس عرفاء وحده وعدكم الحساب
و بسبب بريمر مشعول الصفحة تسرح وكَعد بالبيت , ولأن ماينجرع و يشتري الطلايب بفلوس أقترحت عليه مرته أم مشتاق مشروع بأن يشتري مولدة للمنطقة تريد تخلص منّ چهرته, أول بدايته أرتكب على أبو المولدة السابق وشلعه بليله ظلمه
و ثاني شي سواه هو زيادة سعر الأمبير , والوادم ساكته و تشتّم بيه سكتاوي
صار كم يوم لاحظت فد شي غريب, لما تفصل الكهرباء عدنا تفصل وياها كل المنطقة .. اليوم لما رجعت الظهر مريّت بيه , لكيته منبّت جكارته و حاط القوري على الچوله بغرفته
سلام عليكم.. عليكم السلام
شلونك مالونك أبو مشتاق مشتاقين , ردت أعزف على الوتر الحساس عنده خاطر أعرف الشغلة الغريبة وسألته عن أيام زمان شلون كان عسكري مضبوط و شلون الجنود يطافرون من جدامه وياخذوله تحيات و يكَعدون بالأربعة الفجر مستعدين .. خطيه دمعت عيونه , لأن دينه ومذهبه الجيش , ثلاثين سنة عمر بطوله مو لعب چعاب ولا عبرة وكت يفيد ويّاه  النسيان و التغليس ..
المهم وصلت الى نتيجه , وسولفلي الحقيقة , طلع أخينا بألله يطفي الجوزات كل شوية , لأن يتونّس لما يشوف الناس تطلع بالظهاري , يريد حركة دائمة و نشاط , يضوج لما يشوف المنطقة هادئة , وكلما نامت الوادم طفاها عليهم وخلاهم يطّافرون مثل جنوده أيام زمان ... المهم شاورته وحلفته بعد مايطفي جوزتنا لأن داعيكم يرجع الظهر تعبان والأزدحامات لوحدها تشيّب الرضعان و لما سألته عن بقية الناس شنو ذنبهم ,كَال معليك بيهم , خلي أخليهم كاعدين حالهم من حالي , أكثرهم كانوا جنود عندي و ياخذولي تحيات ويتوسلون وهسه نايمين للمغرب بجالي ... عفيه بلد كلّه ضباط ونواب ضباط وجنود وزادوهم جماعتنا بالدمج و العمليات و الطواريء .. أكيد راح نصير معسكر ضبط و تالينا موخوش تالي ..

سلسلة حكايات مابعد الأحتلال