1- البارحه رجعت تالي الليل من منطقة بعيدة شفت شباب عدهم سيارة كيّا فونتيرا على الرصيف , بصراحه خفت , بعدين طلعوا ديشتغلون على باب الله يريدون يحطّون لافته أنتخابية لواحد أعرفه , زنكَين و أيده مو أله ..
لافته أنتخابية أحسن كثير من زراعة عبوة على جانب الرصيف رغم أن الفرق قليل بينهما .. لو زارعيلهم نخلة كان أخذتلهم صورة أشارك بيها بمسابقة أفضل صورة بناشيونال جيوغرافيك أكيد تفوز ويعتبروها حدث العام الأقوى
2- وصلتني هديّة من نائبة الآن و مرشحة خوش بنيّه , عبارة عن سجّادة صلاة و سيت أقلام و عطر ومعهم كارتات كتب على ظهرها آية قرآنية !! شلون طريقة ذكية , لاتكَدر تمزقهم ولاتشمرهم بالكَاع , لازم كل شوية نبوسهم ونحطهم على الكَصه .. بصراحة الهدية كل شغلاته درجة أولى وأصلية وبالعافية عليّه
3- اليوم بطويريج موزعين لكل واحد موثوق و(حالف) 100 ألف دينار عدّا" ونقدا" ... منو أبو الميتين ... خلي نشوف باجر شكد سعر الصرف
4- ميثم كريدي يكَول : ذولي المرشحين نفس مرشحي ذيج الدورة لكن غيروا الكتل و الأحزاب وكل واحد صار بغير صفحة ... هذا صاحبي خبيث وأعرف قصده لأن يكره العملية السياسية ويعتبرهم مجرد أشخاص منتفعين ميعرفون بس مصلحتهم
5- باجر معزوم على ناطوح و سابوح و سأقول وداعا" للباحوث واليابسة وتمّن و ألف رحمة على والديك يامن أخترعت الديمقراطية
ليست هناك تعليقات:
إرسال تعليق