مسولفجية مصلحجية ... حاجه أحلى من حاجه بربع
أكملت الفطور وخابرت صاحبي ماجد
أسمعت بيه مريض , شلون ورطه الواحد مابيه حيل وره الفطور الرجّال أستلمني أربعين دقيقة وشويه
سوالف جابها من عكّا لمكّه وآخر شي كَام يحجي بالسياسة
و صار براسي فولتير و سألته عن صاحبه الدوك برهم وشلونه الشغل وياه , رأسا" سكت و فيماالله .. وطار الرصيد
طلعت لكَيت أبو صفاء ضارب ركن براس الشارع ويّاه جماعة أعرفهم
هم طلع محصور كومة سوالف طفّيت السيارة وظليت واكَف يمه ثلث ترباع الساعة
صار براسي غيفارا وكَام يشتّم ويهد وينفلت , شكَال النائب الفلاني وشحجا
العلاني و شلون الفساد والأرهاب واصل للظالين , سألته شخبار مكتب الرصافة
, وشكَد خصصولكم , أستلمتوا الخمسين مليون هذا الشهر , هم سكت وخلصت منّه
بطريقة لان أعرفه فد واحد لوكَي ومصلحجي حجّاي وجهين
نفس الشي لما
كَعدت ويه عدنان و رعد و أبو علاء , تصير السوالف ولما توصل للمصلحه , هم
ياريت مصلحه بيها خير , ينلصمون و يسكتون ويكَلبون السالفة على داخل حسن و
حضيري أبو عزيز
ياهو اليجي يصير براسي أبو جاسم بس ينعثل ويدردم حالهم حال الزملاء والجوارين .. مدري يخافون مدري مايفكرون مدري بس يريدون يعيشون
آخر شي رجعت للبيت ولما درت التلفزيون على كم قناة لكَيت
الصريخة للظالين كل أثنين متكَابلين ومتكَاوعين
سوالف وقبض ماكو وهاي الربابة صارلها عشر سنين
شعب مسولفجي مايعرف بس القال والقيل و الكل يتلاطم و يدردم و يدعو للتغيير
, كل واحد يشوف نفسه ملك وأمير وتاهت الغزلان و الحمير , ومابقى واحد
يفكر بالمصلحة الجبيرة للناس كُلها و يفعل مو بس يسولف , وضاع الزين بسعر
الشين والعاقبة للصادقين المبدئيين المنقرضين .
فوك القهر أجاني
الخبر الموزين : كندا تهدد السيد نائب الرئيس خضير الخزاعي بسحب الجنسية
الكندية اذا وقّع على مصادقة أحكام الاعدام .. ورطة جبيرة وهم راح يخسر
العراق بالحالتين ...
محسن لفته الجنابي تموز 2013
ليست هناك تعليقات:
إرسال تعليق