أبو علي - الله بالخير عيوني أبو نورس اليوم
الكَهوة نوّرت بوجودك .. أبني جودي فد چاي زنكَين لعمك .. أخويه أبو نورس متكَلي
وين مختفي لخاطر الله ؟
أبو نورس - الحمدُ لله خويه أبو علي
تعرف كان رمضان وكلمن حاير بروحه بس يريد يبري
ذمتهأبو نورس - الحمدُ لله خويه أبو علي
أبو علي - مأجور وصيام مقبول وعيد سعيد عليكم , أي شلونك أخبارك علومك أشو ضعفان ومتغيّر , هاي كُلها حسبة شهر ونص مشفتك , هيچ صرت تكَول واحد نايم مستشفى , خيرك أخويه ؟
أبو نورس - يمعود أشو حياتنا صارت بدون ملح , كُلها ركض بركض , الواحد ماشايف دربه مدري نحير بمصرف البيت والولد مدري بالخط الذهبي لو بانزين للسيارة و فوكَاها الموبايلات والجكَاير .. لو أعددلك للصبح متخلص المطاليب
أبو علي - شلون خلصته لرمضان ؟
أبو نورس - الحمدو لله والشكر ماناكل بس وجبتين , فطور وسحور , كيلو التمر كان بثلاثه ونص و بطل اللبن بألفين تعرف مايكفينا لأن أحنا عشر نفرات لازم من كل حاجة أثنين ,و الفاكهة والمخضّر صارن ميتحاچن , كٌلها مستوردة ويوميّة سادّيها للحدود
أبو علي - ومن أجا العيد شلون دبرتها ؟
أبو نورس - خويه أبو علي ربك مايكَطع , أتقرّضت كم فلس من خيّر و أشتريت للجهال هدوم و ضميت بالمجمدة كم دجاجة على كم كيلو لحم علمود المحبين والخطاطير وفضّت على خير
أبو علي - وشغلة المدارس شسوّيت عليها ؟
أبو نورس- الله كريم , كلما يلحّون عليّة الجهال أكَوللهم بعده مانزل الموديل الزين
أبو علي - شكد مطلوب هسّه ؟
أبو نورس - الحچي بيناتنا , أم الجهال تسألني نفس السؤال كل شويه , أكَوللها مطلوب بس مليونيين , ماتدري بيّه مطلوب سبع ملايين
أبو علي - حضّر نفسك أخويه أبو نورس , راح يجيك العيد الچبير , بس لاتوصل ديونك عشر ملايين هو راتبك خمسمية وخمسين شلون راح تدبرها , من هاذي صاير عودان .. لأن تاكل بالدين
أبو نورس -نيالك أبو علي , أبو طبع أسأل على سلامته , بطران وشابع خبز , شكَد تحچي لخاطر الله , حتى لو بالع مسجل هم چان طفر من صوت أنفجار لو طلقات أرتال المسؤولين .. خلي أروح أنهزم للبيت أكَابل الحوبة مرتي لو أباوع أخبار بلكي نشوفلنا خبر زوين , يكَولون النواب كَاعدين .. أودعناكم أخويه
أبو علي - أما صدكَ عجيب أمر ذولي العراقيين , هذا أبو نورس أحبه وأموت عليه ودزّيتله على چاي على حسابي , لو بس أعرف ليش يكرهني ... يمكن لأن أحرجة و أذكره بالواقع , هو صدكَ واقع مرير ... شأسوّي اذا طبعي صريح ... وألف مرّة أكَول أحنا شعلينا , أبني جودي خاف واحد يسأل عليه , كَوللهم راح للبيت ...
أودعناكم أغاتي
محسن لفته الجنابي 12-9-2012
ليست هناك تعليقات:
إرسال تعليق